XX Conciertu pola Oficialidá, segundu actu

Nun tengo pallabres pa describir esti despliegue de medios. Foi impresionante. Los artistes tuvieron a l’altura les circunstancies y la xente tamién respondió. Salió tou redondo.

Como el dii anterior, llegamos pa ver a los segundos del cartel. Los que abrieron la tarde fueron el grupo folk DRD. A continuación, La Col.lá Propinde lleváron-nos a tierres lexanes con sus variaos cancios. Los terceros fueron los hermanos de les canciones na maleta, Tejedor. Personalmente, nun me gusten en excesu, pero la verdá ye que suenen perbien en directu. Cuando acabaron, foi el turnu de La Bandina, que algamaron que’l pabellón enteru cantara Na caleya. Dempués, salieron los de Tolivia, Los Berrones, sin Tante (que paez-me que dexó el grupu) y sin batería (que rompió’l brazu). A pesar d’ello, dieron un prestosu y novedosu conciertu acústico que prestó abondo. Pa poner la guinda a la tarta, los inconfudibles saltos de Xune; Dixebra, incombustibles. Yá p’acabar el conciertu, Chalaneru Sound, con sones xamaicanos.

De xuru que Tini oyó los glayíos. De xuru que ésti foi l’últimu Conciertu pola Oficialidá (yá tuvo bien con venti), el del año que vien, será el primeru de la Oficialidá, y toos taremos pa velo…

XX Conciertu pola Oficialidá, primer actu

Yá pasó la primer xornada de la venti edición del Conciertu pola Oficialidá. Yá facía tiempu que nun lo pasaba tan bien n’un conciertu.

Entamó col grupu de L’Entregu, Nuberu. A estos nun pudi velos, porque nun llegamos a tiempu. Cuando entramos nel pabellón, taben yá Llan de Cubel. Ayeri foi la primera vegada que los saboreaba en directu, y nun me defraudaron. Dempués, yera el turnu de Skanda, que llenaron los nuesos oídos de guitarreos amestaos con gaita y vigulín. Cuando acabaron, el hip-hop n’asturianu fue el protagonista, con K-Nalón y Delfo Tarrancha, que yá forma parte del grupu. La verdá, ye que aburriéronme, porque nun soi yo munchu d’esi palu. La música lletrónica de Xera tuvo tamién el so espaciu. Sorprendió-me la tira’l so soníu, pero gustó-me. Yá pa acabar, tocaron Skama La Rede. Estos, cuando entamaron a tocar pel mundu, sonaben meyor, paezme a min. Agora, dame la impresión de que nun trabayen el soniu nos conciertos ni ná. Ellos sabrán lo que faen. Antes de que acabaren, yá colamos pa casa, que’l cursu pasa factura. Pero eso nun quier decir que acabare’l conciertu. Tovía faltaba l’actuación de Gomeru.

Prestó-me nun sé cuándo dir a esti conciertu. Pa encima, vi a Víctor y a Iván, collacios del cursu.

Güei más y meyor…

XX Conciertu pola Oficialidá

Na más que falta una selmana pa que se faiga l’acontecimientu de l’año n’Asturies: la XX edición del Conciertu pola Oficialidá. Esti añu va celebrase n’el recintu de la Feria de Muestres en Xixón. Paezme a min que ye por festexar los venti años, esta vegada va ser en dos xornaes (vienres y sábadu) y va contar colo más granao del panarama musical asturianu.

Hai que destacar sobre manera la actuación de Llan de Cubel, que toquen per equí cerca poques vegaes, y ye una buena ocasión pa velos. Dempués, tamién tarán grupos de eso que llamen ‘amestao’, como La Bandina, La Col.lá Propinde o Skanda. Tamién apaecerán los de Candás, Skama La Rede. Y pa redondear tou’l tinglao, dos grupos veteranos: Los Berrones y Dixebra (yá tengo ganes de ver a Xune faciendo saltos triples pel escenariu).

Pa concluir: cita obligá pa toos los que vos preste esti tipu de música.

¡Na reforma de l’Estatuto, l’asturianu llingua oficial!